FA’ASILASILAGA TĀUA MO LE EKALESIA EFKS SANDRINGHAM

Fa’afetai ua alafa’i ma ii fanuga lelei i lenei taeao fou. E talitonu o lo’o maua pea le filemu o le Atua i lo tatou aiga lotu a’o tatou folau i totonu o peau vale o le fa’ama’i oti o le COVID-19. Malo le onosa’i, malo le tatalo, fa’afetai le fa’aletautai…

O lea ua fa’asilasila manino e le Palemia o Jarcinda Adern le toe fa’aauauina o le tapu ma le sā mo Niu Sila i le la’asaga 3 (Level 3). Ma ua tatou masani fo’i i le fa’atinoina o lea fa’amoemoe e pei ona taulogologo ina atu i aso ma taimi ua mavae. Ae maise, o lea ua a’afia se tasi o ā tatou Ekalesia EFKS i Mangere i le fa’ama’i o le COVID-19. E iai le talitonuga, ua fa’atupu popole i le to’atele e nonofo ma alaala i le pitonu’u o Mangere ma Aukilani i Saute ma a’ai tuaoi ona o lea tulaga. Ae maise le a;afia ai o nisi o aoga e a’ooga ai a tatou fanau.

O lea e to fa’amanatu atu ai ma le agaga maualalo, ia amanaia e le tatou Ekalesia, ma o tatou aiga,  ma uo uma a le tatou Ekalesia, e masani ona tatou tapua’i fa’atasi, fa’atonuga ma fuafuaga uma a le malo o Niu Sila ua fa’ata’atitia ina ia vave fo’ia le pepesi o le fa’ama’i o le COVID-19 ua i ai nei.

Ma e fautuaina ai le tatou Ekalesia Sandringham e fa’apea:

1.     E LE FA’ATAUNU’UINA LE TATOU TAPUA’IGA I LE ASO SA, 16 AOKUSO, 202O, I LE TATOU MALUMALU TAPUA’I I SANDRINGHAM E PEI ONA MASANI AI…

2.     AE O LE A FA’ASALALAUINA ATU TU’USA’O (LIVE STREAMING) LE TATOU LOTU I LE TATOU FACEBOOK “EFKS SANDRINGHAM” I LE 10am I LE TAEAO.

3.     E TATALA INA PEA FAITOTO’A O LE PA O LE FALESA I ASO TA’ITASI ONA E FA’AAUAUINA PEA LE GALUEGA A KAMUTA I LE FALE O LE GALUEGA O LO’O FAIA NEI

4.     AE FAUTUAINA LE TAPUA’IGA MASANI MO LE FALE O LE GALUEGA IA AUA NE’I AUAI ATU SE TASI I LE FANUA O LE EKALESIA I LE TAIMI ATOA E FA’AGASOLO AI LE TAPU MA LE VAVAO A LE MALO O NIU SILA.

Le tatou Ekalesia Sandringham, e lē toe a’oa’ia e Laupuā Tamafaigā, auā o le nā ua ia te outou le tofā ma le uta, ma ua tele fo’i lapata’iga ua tu’uina atu, e faia ai fa’ai’uga lelei e malu puipuia ai oe ma lou aiga, ae maise ou tuaoi, ma pitonu’u ma a’ai ua e aumau ai.

Ia fa’amafanafanaina pea aiga ua maua i lenei fa’ama’i, ae maise le Ekalesia i Mangere i le Susuga i le Faifeau ma le Faletua fa’apea le Ekalesia ma le Aulotu ona mafatiaga ua feagai ma i latou ona o le COVID-19 i lenei vaitau.

Ae mo le tatou Ekalesia Sandringham, e leai lava se tasi tatou te malu ai i taimi fa’apenei, ua na’o lo tatou Atua e ala ia Iesu Keriso; o ia e maua ai le filemu ma le fa’amalologa mo tatou tino, loto, ma agaga e maua i mafatiaga.

A tatou manatua pea upu fa’amafanfana a le Atua i le Perofeta o Ieremia ma lona nu’u o Isaraelu i taimi na feagai ai ma faigata ma tiga ma puapuaga: “Auā o a‘u nei, ua ou iloa manatu ua ou manatu ai ia te outou, o manatu i le manuia, ae lē o le malaia…e foa’iina atu ia te outou le i’uga e i ai le fa’amoemoe. Ona outou vala’au ai lea ia te a’u, e ō fo’i outou ma tatalo ia te a’u, ou te fa’alogo fo’i ia te outou. E saili mai outou ia te a’u, tou te maua fo’i, pe ā outou saili mai ia te a’u ma outou loto atoa. E maua lava a‘u e outou…”

Ia tausia le tatou Ekalesia e a’ao agalelei o lo tatou Atua i lenei vaitau…

Ia manuia

Featunai & Perise Liuaana

 

 

Posted: Sat 15 Aug 2020

Back

© Copyright Featunai B Liuaana - Site map
Phone: +64 8460180 Sandringham New Zealand

Website Builder - Website World