FA’AMATALAGA LATA MAI MO LE COVID-19

E FA’ATALOFA ATU I LE TATOU EKALESIA I LENEI TAEAO FOU. TALOFA, TALOFA LAVA…

Fa’afetai ua ālafa’i mai fanuga lelei, i le tausiga agalelei lelei o le tatou Atua. Fa'afetai le faimalaga ma le manuia ma lo tatou Ali'i o Iesu i le Eseta. Fa’amalō le onosa’i, a’o tatou usita’ia tulafono o le vavao a le tatou Malō o NIu Sila ona o le COVID-19.

A’o tatou i ai i le vaiaso lona tolu (3) lenei o le vavao, e toe valuvalusia lava a’a o le la’au i finagalo o le tatou Ekalesia, ae maise o tatou aiga, ma uō, ina ia tatou mataāla ma mata’itū pea le vavao a le Malō ma ona aiā’iga, mo le tatou saogalemū.

Ua ou fa’alogo i nisi fai mai e aua le popole i le vavao a le Malō, e le malosi se Malō i le Atua. Fai mai a lava le fa’atuatua i le Atua, e leai se tasi e āfaina auā e sili atu le malosi o le mana o le Atua i lo le malosi o le COVID-19. E moni e malosi le mana o le Atua, ae oute fautuaina i tatou uma, aua le fa’asesēina outou mafaufau i nei fa’amatalaga.

Auā a tatou va’ai i atunu’u e pei o Italia, Sepania, Siamani, Korea i Saute, Peretania, Amerika, ma nisi o motu o le Pasefika, e o’o lava i Isaraelu, o le to’atele o ē maliliu o tagata fa’atuatua i le Atua.

A’o upu masani a Samoa – e toli le pula e toli fo’i le moto…e le fa’ailoga tagata le COVID-19, pe te lotu pe leai…e a’afia i tatou uma…

E LE A’OĀ’IA E LAUPUĀ TAMAFAIGĀ AE TĀTĀ LOGO PEA MASEFAU:

1. O lo’o naunau pea le Malō e tapunia auala uma e sosolo ai le COVID-19 i le su’eina o i latou e iai pi’itaga ma ē ua pisia (contact tracing) atoa ai ma su’esu’ega o tagata ta’ito’atasi (testing). E tusa ai ma le upu a le Palemia o Jacinta Ardern, e le’i o’o lava i tatou i se auala e ō ese ai maI le Maulauga 4 (Level 4) o puipuiga o lo’o iai nei.

2. O le Aso Lua 14.04.2020, (le asō) e maua ai se fa’aaliga mai le Fale Tupe o Niu Sila (Treasury) i ana fuafuaga mo le tamaoaiga o Niu Sila i le aga’i i luma.

3. O le Aso Lulu 15.04.2020, e faia ai se tautalaga a le Minisita o Tupe, Grant Robertson, i le au fai-pisinisi o Niu Sila, i auala e fa’aitiitia ai le āfaina o le tele o pisinisi a’o iai i le vavao, atoa ai ma le toe fetu’una’iga o le Tala Fa’atatau O Le Tupe mo le 2020.

4. O Le Aso Tofi 16.04.2020, o le a saunoa ai le Palemia o Jacinta Ardern e fa’ailoa foliga o aiāiga mo le Maualuga 2 ma le Maualuga 3 pe ā o’o ina la’asia e Niu Sila i le lumana’i.

Ua fautua pea le Malō ia aua ne’i ō tatou manatu mamā i le taumafai e fo’ia le COVID-19, e tusa pe suia le Maualuga e o’o i ai le vavao. Fai mai Ardern: "We cannot be complacent. Behind one case can sit others."

5. Ua fia fa’amamafaina atili i le tatou Ekalesia, ma aiga, ma uō, le āfaina gofie o soifua o tatou tagata matutua, Aua tatou te manatu māmā i lea tulaga. Va’ai fa’alelei i latou. Po’o le ā lava le Maualuga e o’o i ai le vavao a Niu Sila, ia malu puipuia pea ma fa’aeteete i le a’afia o tatou tagata matutua. O le to’atele o ē ua maliliu i NIu Sila (fa’apea le lalolagi) o tagata matutua i luga atu o le 70 tausaga.

6. Ia fafano so'o ma fafano mama lima, ma tausia pea le va fa’atulagaina, e lua (2) mita, ma isi pe ā ō ese atu i fafo mo tatou fale. Aua le feōa’i i feau lē tatau se’i vaganā ai supamaketi, foma’i, ma le falema’i.

7. Fa’aeteete pe ā tufa taumafa i tagata matutua ma aiga, ia tausi le va ma i latou e asiasi atu i ai. Ia fa’aitiitia le fa’atinoiina o lea fa’amoemoe i nai aso o le vaiaso ae lē o aso uma.

8. Ia manatua le tagavai a le COVID-19 mo lenei vaitau: IA SAOGALEMŪ. IA AGAMALŪ. IA OLA.

Le tatou Ekalesia, aiga, ma uo, ia onosa’i, toeitiiti lava tatou iloa atu mālama mai lenei pogisā e ufitia ai tatou ona o lenei fa’ama’i. Ia tatou fa'atuatua i le Atua a'o tausi le vavao a le Malō o Niu Sila, e ui ina tatou le toe tapua’i fa’atasi i malumalu e masani ai.

Fai mai se tasi o Faifeau lotu Katoliko Roma, Archbishop Jose Horacio Gomez, “ E ui lava ina tapunia o tatou falesā ae lē o fa’amā’ia Keriso, e lē o saisaitia lana talalelei.” – “Our churches may be closed but Christ is not quarantined, and his Gospel is not in chains.”

Ia tatou tatalo i le Atua ia malu puipuia i tatou uma, ma tatou Ekalesia, ma o tatou aiga, ma uo.

Ia tatou maua le mafanafana i upu a le Aposetolo o Paulo, “O le Atua foi e tupu mai ai le faamoemoe, ia fa'atutumuina outou e ia i le olioli uma atoa ma le filemu, ina ua fa'atuatua; ina ia tele lava lo outou faamoemoe ona o le mana o le Agaga Paia” - “May the God of hope fill you with all joy and peace in believing, so that by the power of the Holy Spirit you may abound in hope.”

IA OUTOU MANUIA….

Featunai & Perise Liuaana

Top of Form

 

Posted: Tue 14 Apr 2020

Back

© Copyright Featunai B Liuaana - Site map
Phone: +64 8460180 Sandringham New Zealand

Website Builder - Website World