TALA LATA MAI I LE COVID-19

E faatalofa atu i le tatou Ekalesia fa'apea le tapua'iga a o tatou aiga, ma uo, o lo'o nofo tatalo mo se manuia o tatou tagata lautele male lalolagi, ae maise lo tatou feagai ai ma le COVID-19. O lea ua tatou iai i le vaiaso lona lua o le vavao a le Malo o Niu Sila ina ia fo'ia le fa'ama'i. Fa'amalo le onosa'i, fa'amalo le loto tetele, fa'afetai le fa'autauta ma le fa'atuatua.

O lo'o alualu a'e pea i luga le fuainumera o tagata a'afia i le COVID-19 i Niu Sila, ae fa'afetai i le agalelei o le Atua e to'atasi lava le ua maliu i lenei fa'ama'i, a'o lo'o lelei pea le fa'afoeina e le Malo, ma le Soifua Maloloina, fa'apea foma'i ma teine tausima'i lo tatou fa'amoemoe.

Fa'amalo i le tatou Ekalesia ma aiga, ae maise uo i le feasiasia'i i luga o telefoni ma upega-tafa'ilagi. Ae maise fo'i a outou fa'amanuiaga mo maua ma Perise ma le fanau. O lo tatou faia o lea tiute, o le tatou faia lava lea o le finagalo o Keriso e pei ona ia fetalai "o se itiitii o i latou nei ua e faia i ai, o a'u lava le na."

Ae avea fo'i lenei avanoa e aualofa atu ai i le au matutua o le tatou Ekalesia, i fale o tagata matutua, ma i latou ua nofo fale ona o ma'i tumau, ae maise i latou ua fa'ataotolia i aiga ona o gasegase masani.O nisi o outou e fesoota'i atu ae le maua pe le tali ina mai le telefoni. A'o le tatalo a maua ma Perise, ia outou maua le fa'amalologa paia a le Atua, ma ia malu puipuia outou i a'ao agalelei o lo tatou Atua.

Avea fo'i lenei avanoa e fa'amanuia atu ai le aso soifua o le tina matua ia Folasaitu Taualai Luatua ua fa'ailogaina i lenei aso (6 Aperila) lona 90 tausaga. E tatalo pea i le Atua ia fa'afualoa lou soifua Folasaitu, ma ia avatu e le Atua le malosi ia te oe le tina tatou te mafuta ai pea i nisi tausaga se tele.

Ia manatua i le tatou tatalo le lalolagi mafatia, fa'apea Niu Sila ma ona tagatanu'u, ae maise si o tatou atunu'u o Samoa ma motu o le Pasefika. Tatalo mo nai foma'i ma tausima'i, ma i latou o lo'o galulue e tapena ma saunia le tamaoaiga o lo'o mo'omia e tagata lautele mo le ola.

Ia manuia tele lenei vaiaso i o tatou aiga lotu fa'apea le tapua'iga o tatou aiga i Niu Sila nei ma atunu'u i fafo.

Alofa tele atu
Featunai & Perise

Posted: Mon 06 Apr 2020

Back

© Copyright Featunai B Liuaana - Site map
Phone: +64 8460180 Sandringham New Zealand

Website Builder - Website World