FAUTUAGA TAUA MO I TATOU UMA

O lea fa’atoa uma ona saunoa le Afioga a le Palemia o Niu Sila, Jacinda Ardern, ua to’atasi le ua maliu i le fa’ama’i o le COVID-19. Ma o le fautuaga malosi a le tama’ita’i Palemia, ia usitaia le vavao a le Malō o Niu Sila o lo’o taoto nei, i le taumafaiga e fo’ia le pepesi o le fa’ama’i ua maliliu ai le 30,851 tagata i le lalolagi e o’o mai i le asō.

Ou te tatalo atu i lo tatou atunu’u, i aiga, ma Ekalesia, ma taganu’u uma, ia tatou fesoasoani e fo’ia lenei fa’ama’i mata’utia, i le usitaia o le tulafono o le vavao ua faia nei mo le 4 vaiaso.

Ia amanaia mea nei:

1. Ia nofo fale, nofo ese (self-isolate) i tatou ta’ito'atasi i ō tatou aiga. Aua ne’i toe i ai se feso’ota’iga i le tino (no physical contact) ma isi tagata e le o aofia i totonu o le li'o o lou aiga sa i le amataga o le vavao.

O lona uiga ua sa le toe potopoto i mafutaga sa masani mai ī ma ō, ua sa le toe asiasi i isi tagata o lou aiga e le o nonofo ma oe.

Ua fa’asāina fo’i ona toe potopoto i tapua’iga i lotu masani.

2. Taumafai e feso’ota’i ma aiga i le telefoni ma isi aula fa’a-tekenelosi, ae aua le feasiasia’i ma le feōa’i.

3. Ia manatua, pau lava mea o lo’o fa’atagaina e mafai ona tu’ua ai lou fale o le aga’i i le supamāketi, foma’i, falema’i, fale talavai ma isi nofoaga ua i a’i le fa’atagana e auai.

4. Ia manatua fo’i, ua i ai le malosi i le Ofisa o Leoleo e molia ma fa'afalepuipui i latou e lē usita’ia le tulafono o le vavao mo le 4 vaiaso ua fa’amalosia nei.

5. Mo le silafia, o le tagata muamua ua maliu i le COVID-19 i Niu Sila nei, e 70 tausaga le matua.

E fautuaina atili ai o tatou aiga ia va’ai lelei nai o tatou mātua matutua. Aua le so’ona feōa’i i tatou ma toe fo'i ane i le aiga, e ona au mai ai le fa’ama’i e afaina ai o tatou tagata matutua.

Ia malu puipuia o tatou aiga i a’ao agalelei o lo tatou Atua.

Manuia le Aso Sapati

Featunai Liuaana (FS)

Posted: Sun 29 Mar 2020

Back

© Copyright Featunai B Liuaana - Site map
Phone: +64 8460180 Sandringham New Zealand

Website Builder - Website World